Peppi Pepsíkarl er alltaf tengdur við súrefni

Peppi Pepsíkall hefur látið að sér kveða á leikjum í Pepsideildinni í fótbolta í sumar en hann lék stórt hlutverk á blaðamannafundi í gær þar sem Ölgerðin og Sport Five skrifuðu undir samstarfssamning. Úrvalsdeild karla og kvenna mun bera nafnið Pepsideildin fram til ársins 2015 en samstarf þessara aðila hefur staðið yfir frá vorinu 2009.

Sport Five er rétthafi sjónvarpsréttar og nafnaréttar efstu deilda karla og kvenna í fótbolta.

„Hann er tengdur við súrefniskút drengurinn, vegna þess að þetta krefst mikillar orku og súrefnis að vera fíflast fyrir krakka og áhorfendur," sagði Andri Þór Guðmundsson forstjóri Ölgerðarinnar þegar hann var inntur eftir þeim gríðarlega hávaða sem fylgir Peppa.

Geir Þorsteinsson formaður KSÍ segir að það hafi mikla þýðingu fyrir deildina að hún beri sama nafnið yfir langan tíma.

„Þetta skiptir miklu máli, bæði fyrir okkur og styrktaraðilann. Það skilar meiru eftir því sem nafnið helst lengur á deildinni. Staðan var þröng á sínum tíma en okkur tókst að leiða saman Ölgerðina og Sport Five. Það samstarf hefur verið glimrandi," sagði Geir m.a. en þessi samningur sem gerður var í gær breytir engu fyrir KSÍ sem gerði samning við Sport Five fyrir nokkrum árum um sjónvarps – og nafnarétt efstu deilda karla og kvenna.

Sá samningur er til sex ára og segir Geir að sá samningur skipti KSÍ og fótboltafélög landsins gríðarlegu máli. „Við fáum meiri tekjur af þeim samningi en nokkurntíma fyrr. Það skiptir okkur hundruðum milljóna," sagði formaðurinn.

Andri segir að samningurinn kosti Ölgerðina umtalsverða fjármuni. „Samningurinn er ekki einu útgjöldin þessu samhliða. Við erum að fjárfesta mikið í umgjörðinni og auglýsingum í kringum þetta í þeirri viðleitni að búa til skemmtun fyrir fjölskylduna og draga fólk á völlinn. Samstarfið hefur gengið vel – við sjáum aukna sölu á okkar vörum, en það er líka ánægjulegt fyrir fyrirtækið að geta gefið eitthvað til baka í íþrótta – og æskulýðsstarf með þessum hætti. Úrvalsdeildin í fótbolta er flott vörumerki," bætti Andri við.