Umfjöllun: Stjarnan hirti öll stigin í Árbænum

Stjarnan vann flottan sigur á Fylki í Árbænum ,3-2, en öll mörk leiksins komu í síðari hálfleik. Stjarnan gerði þrjú mörk á fyrstu 11 mínútum síðari hálfleiks, en Fylkismenn náðu að minnka muninn.

Það tók Fylkismenn ekki nema 16 sekúndur  að koma sér í fínt færi en Albert Brynjar Ingason, leikmaður Fylkis, fékk sendingu inn í teig en skot hans fór beint á Ingvar Jónsson í marki Stjörnunnar.

Eftir þetta róaðist leikurinn heldur mikið og mígandi rigning setti svip sinn á leikinn.

Eftir tíu mínútna leik náði Bjarki Páll Eysteinsson, leikmaður Stjörnunnar, fínu skoti á mark Fylkis en Bjarni Þórður Halldórsson varði vel í marki Fylkis. Halldór Orri Björnsson hirti  frákastið og skaut lengst yfir.

Tíu mínútum síðar átti  Halldór Orri Björnsson flotta stungusendingu á Garðar Jóhannsson sem setti boltann framhjá. Töluverð hætta á ferð. Fátt annað markvert gerðist í fyrri hálfleiknum og staðan því 0-0 í hálfleik.

Síðari hálfleikurinn var heldur betur frábær og byrjaði með látum. Á 54. mínútu leiksins kom Baldvin Sturluson gestunum yfir með fínu marki, en hann fékk boltann rétt fyrir utan teiginn og þrumaði honum í netið. Baldvin hafði komið inná í hálfleik.

Tíu mínútum síðar var komið að örðum varamanni Stjörnunnar en Atli Jóhannsson pottaði boltanum í netið af stuttu færi eftir fyrirgjöf frá Herði Árnasyni.

Fylkismenn tóku síðan miðju og töpuðu boltanum strax til Stjörnumanna. Það endaði með því að Garðar Jóhannsson skoraði sitt 13. mark í sumar, en heimamenn voru í vandræðum með að hreinsa boltann út úr vítateignum, það nýtti Garðar sér og lagði boltann snyrtilega framhjá Bjarna Þórði í marki Fylkis.

Allt stefndi í algjört rúst gestanna, en Fylkismenn neituðu að gefast upp. Fimmtán mínútum fyrir leikslok fékk Fylkir aukaspyrnu fyrir utan vítateig. Kjartan Ágúst Breiðdal gerði sér lítið fyrir og þrumaði boltanum í netið úr spyrnunni, alveg óverjandi fyrir Ingvar Jónsson í marki Stjörnunnar.

Albert Brynjar Ingason náði síðan á loka andartaki leiksins að krækja í vítaspyrnu þegar hann slapp einn í gegn, en Ingvar Jónsson, markvörður Stjörnunnar, krækti í lappir Alberts og vítaspyrna dæmt.

Albert skoraði örugglega úr spyrnunni, en það var of seint og dómari leiksins flautaði til leiksloka. Stjarnan hefur ekki tapað í sjö leikjum í röð og er á mikilli siglingu.

Fylkir  2 – 3 Stjarnan

0-1 Baldvin Sturluson  (54.)

0-2 Atli Jóhannsson (64.)

0-3 Garðar Jóhannsson (65.)

1-3 Kjartan Ágúst Breiðdal (75.)

2-3 Albert Brynjar Ingason, úr víti (93.)

Skot (á mark): 7 – 7 (5-4)

Varin skot: Bjarni  1 – 4 Ingvar

Horn: 6 – 5

Aukaspyrnur fengnar: 9–12

Rangstöður: 5-0



Dómari: Erlendur Eiríksson 7