Willum: Ekkert sjálfgefið í þessari deild

Willum Þór Þórsson, þjálfari Keflavíkur, segir að sínir menn muni áfram berjast fyrir tilverurétti sínum í Pepsi-deild karla en liðið tapaði fyrir Fram í miklum botnbaráttuslag í kvöld, 1-0.

Fram komst upp í átján stig með sigrinum en Keflavík, Breiðablik og Þór eru öll með 21 stig og Grindavík 20 stig þegar tvær umferðir eru eftir. Keflavík á þó leik til góða - gegn KR á fimmtudaginn.

„Það er alveg ljóst að við munum ekkert gefa eftir í þessari baráttu. Það er bara það gamla góða sem gildir - að einbeita sér að einum leik í einu. Framarar eru að berjast fyrir sínu lífi og það erum við líka. Það er ekkert sjálfgefið í þessari deild og við munum halda áfram að vinna vel í okkar málum allt til enda mótsins,“ sagði Willum eftir leikinn í kvöld.

Hann segir að það hafi verið lagt upp með að verjast aftarlega gegn Frömurum í kvöld. „Það kannski virtist vera þannig að það hafi legið mikið á okkur í þessum leik því leikáætlun okkar var þannig. Það var augljóst að þeir voru að reyna að teyma okkur fram á völlinn til að geta dælt boltum á bak við vörnina okkar. Þeir eru með hraða framherja og ætluðu að reyna að láta þá skapa usla í vörninni okkar.“

„Þetta er það sem við undirbjuggum okkur fyrir og við gáfum þeim því lítið pláss. Svo gleymdum við okkur í eitt skipti og þeir refsuðu okkur fyrir það. Eftir markið settum við ferska fætur inn á völlinn og þrýstum liðinu framar. Jafntefli var hálfur sigur fyrir okkur og við sáum til lands allan tímann. Leikmennirnir lögðu sig fram, börðust allir sem einn og leikaðferðin var að virka. Þetta var hörkuslagur.“