Guðmundur Reynir klárar tímabilið með KR

Guðmundur Reynir Gunnarsson, leikmaður KR, mun leika með félaginu út leiktíðina í Pepsi-deild karla, en Guðmundur er nú við æfingar hjá norska úrvalsdeildarfélaginu Brann.

Kristinn Kjærnested, formaður knattspyrnudeildar KR, segir í viðtalið við íþróttadeild Morgunblaðsins að Guðmundur verði út leiktíðina hjá toppliðinu.

„Þeir vildu bjóða honum út í júlí til að skoða hann. Það var bara ekki hægt á þeim tíma. Menn eru ekki að fara frá okkur í miðjum verkefnum. Þeim var því tilkynnt að þetta væri eini tíminn sem væri laus þar sem hann var ekki valinn í landsliðið eins og síðast,“ sagði Kristinn í viðtali við Morgunblaðið.

Guðmundur Reynir hefur verið einn besti leikmaður Íslandsmótsins í sumar og það yrði mikil blóðtaka ef KR-ingar myndu missa leikmanninn fyrir lokasprettinn.