Icelandair flýgur til Bergen og Stavanger

Icelandair mun fljúga til og frá Bergen og Stavanger í Noregi um næstu jól og áramót. Samkvæmt áætlun verður boðið upp á flug til borganna dagana 21. desember, 28. desember og 4. janúar. Að auki mun mun flug næsta vor til Bergen, Stavanger og Þrándheims hefjast í lok apríl, eða mánuði fyrr en í ár.   

Í tilkynningu frá Icelandair segir að áætlunarflug félagsins milli Íslands og Noregs hafi vaxið hratt á undanförnum árum. Icelandair flýgur allt árið til og frá Osló en yfir sumar- og haustmánuði einnig til þessara þriggja borga á vesturströnd Noregs, Bergen, Stavanger og Þrándheims.

„Flugið hefur verið vinsælt fyrir bæði Norðmenn og Bandaríkjamenn sem geta nýtt sér tengiflug Icelandair yfir Norður-Atlantshafið til gagnkvæmra heimsókna, fyrir Norðmenn sem hyggja á Íslandsheimsókn, en einnig meðal þeirra fjölmörgu Íslendinga sem dvelja á þessum slóðum við nám og störf og fjölskyldur þeirra. Með fluginu nú um jólin og áramótin er Icelandair koma til móts við þarfir allra þessara viðskiptavina,“ segir í tilkynningunni.