Ingimundur Níels í lán til Sandnes Ulf

Norska félagið Sandnes Ulf hefur fengið Ingimund Níels Óskarsson að láni frá Fylki út tímabilið. Þetta kemur fram á heimasíðu norska félagsins.

Ingimundur hittir fyrir annan Íslending hjá félaginu. Steinþór Freyr Þorsteinsson, fyrrum leikmaður Breiðabliks og Stjörnunnar, leikur með félaginu og hefur þótt standa sig vel. Félagið er á toppi norsku B-deildarinnar með fimm stiga forskot þegar níu umferðir eru eftir.

Ingimundur, sem spilaði með Fjölni áður en hann hélt í Árbæinn, er annar leikmaður Fylkis sem flytur sig í norska boltann í sumar. Andrés Már Jóhannesson gekk til liðs við norska A-deildarfélagið Haugesund í lok júlí.