Valsmenn lána Guðjón Pétur til Helsingborg út tímabilið

Guðjón Pétur Lýðsson mun ekki spila fleiri leiki með Valsmönnum í Pepsi-deild karla í sumar því félagið hefur lánað hann til sænska úrvalsdeildarliðsins Helsingborg. Þetta kemur fram á heimasíðu sænska félagsins í kvöld.

Guðjón Pétur hefur leikið frábærlega á sínu fyrsta tímabili með Valsmönnum í sumar og er markahæsti leikmaður liðsins með 8 mörk í 17 leikjum. Valsmenn hafa tapað dýrmætum stigum í síðustu leikjum og hafa þar með misst af lestinni í titilbaráttunni.

Helsingborg endaði í 2. sæti í sænsku úrvalsdeildinni á síðasta tímabili og er eins og er með sex stiga forystu á toppi sænsku úrvalsdeildarinnar. Guðjóni á því möguleika á því að verða sænskur meistari í haust.

Jesper Jansson, íþróttastjóri Helsingborg, segir í viðtali á heimasíðu félagsins,  að hann hafi haft lengi augun á Guðjóni og þá hafi einnig Arnór Guðjohnsen mælt með honum.

„Við ætluðum að skoða hann betur í haust en það var bara betra að fá hann að láni strax. Þetta er áhugaverður sóknarleikmaður sem getur spilað bæði á miðjunni og í framlínunni," sagði Jesper Jansson á heimasíðu Helsingborg.