Umfjöllun: Meistaraheppni í Vesturbænum

KR náði í dýrmæt þrjú stig í titilbaráttunni í kvöld þegar liðið lagði lánlausa Framara 2-1 í Vesturbænum. Öll mörkin komu á síðustu tíu mínútum leiksins.

Framarar voru aðgangsharðari í fyrri hálfleiknum og fengu gullið tækifæri til þess að komast yfir. Steven Lennon fiskaði þá vítaspyrnu sem hann tók sjálfur. Spyrnan var hins vegar arfaslök og Hannes Þór varði auðveldlega.

Ekki í fyrsta skipti sem Hannes Þór kemur félögum sínum til bjargar í sumar. Hannes Þór varði vítaspyrnu Matthíasar Vilhjálmssonar FH-ings á KR-vellinum fyrr í sumar. Líkt og nú var staðan markalaus.

Í síðari hálfeik var meira jafnræði með liðunum. Færi voru á báða bóga en flest stefndi í markalaust jafntefli. Á fimm mínútna kafla seint í síðari hálfleiknum skoruðu heimamenn tvisvar.

Kjartan Henry skoraði úr vítaspyrnu á 81. mínútu eftir að dæmd var hendi á varnarmann gestanna eftir hornspyrnu. Fimm mínútum síðar spiluðu KR-ingar sig fallega í gegnum vörn Framara. Viktor Bjarki sendi fyrir markið og Alan Lowing, miðvörður Framrara, varð fyrir því óláni að senda boltann í eigið mark.

Varamaðurinn og aldursforseti leikmanna á vellinum, Arnar Gunnlaugsson, skoraði fallegt mark úr aukaspyrnu í viðbótartíma. Markið kom hins vegar of seint og heimamenn stigu stórt skref í átt að titlinum.

Það er óhætt að segja að falldraugurinn vofi yfir Frömurum. Þeir spiluðu líklega sinn besta leik í sumar og voru betri aðilinn lengi vel. Hins vegar er ekki hægt að tala um óheppni. Framarar voru sjálfum sér verstir. Þeir nýttu ekki vítaspyrnu, gáfu aðra og skoruðu sjálfsmark.

KR-ingar voru slakir í kvöld en sú staðreynd að þeir unnu sigur rennir stoðum undir grun margra að liðið verði Íslandsmeistari. Ólíkt Frömurum nýttu þeir sín færi í leiknum og nældu í dýrmæt þrjú stig.

TölfræðiSkot (á mark): 13-14 (4-7)

Varin skot: Hannes Þór 5 – Ögmundur 3

Horn: 9-4

Aukaspyrnur fengnar: 16-11

Rangstöður: 2-1

Dómari: Þorvaldur Árnason 7