Rúnar: Þrjú stig það eina sem ég er sáttur við

Rúnar Kristinsson, þjálfari KR, var ánægður með stigin þrjú en ekki spilamennsku sinna manna í kvöld.

„Þrjú stig, það er það eina sem ég er sáttur við."

Rúnar var ekki sáttur með spilamennsku liðsins í kvöld sem hann sagði að hefði þó skánað í síðari hálfleik eftir virkilega slakan fyrri hálfleik.

„Ég var alls ekki sáttur en liðið var samt allt annað í síðari hálfleik en þeim fyrri og við stjórnuðum síðari hálfleiknum meira en þeim fyrri og náðum að knýja fram þessi tvö mörk og landa þessu nokkuð örugglega í restina."

Rúnar hafði á orði að víti KR-inga hefði verið algjört víti en var ekki viss um að vítið sem Framarar fengu hefði verið réttmætt. Er dómgæslan ekki að falla með KR-ingum í sumar?

„Ja, við fengum víti og vel gert hjá dómaranum að dæma. Þeirra vítaspyrna var tæp en hann dæmdi hana. Hann dæmir það sem hann sér og ég ætla ekki að fara að efa hans heiðarleika í því. Honum fannst vera víti, þá dæmir hann víti. Ég get ekki breytt því."