Heimir: Var smeykur við þennan leik

Heimir Hallgrímsson, þjálfari ÍBV, var greinilega létt að hafa unnið Víkinga í kvöld. Eyjamenn gefa því ekkert eftir í toppbaráttu Pepsi-deildarinnar.

„Þetta var flottur leikur hjá okkur - hörkuleikur - en það var bara sorglegt að við skyldum ekki ná að skora fleiri mörk,“ sagði Heimir en viðtalið má sjá í heild sinni hér fyrir ofan.

„Við fengum urmul af góðum færum og ég held að við þurfum að fara á skotæfingu í Vestmannaeyjum. Ég held að það sé alveg klárt.“

„Víkingar eru að berjast fyrir lífi sínu í þessari deild. Við vissum að þeir kæmu grimmir til leiks. Aðalmálið var að leyfa þeim að fá ekki neitt sjálfstraust en eftir að fyrsta markið kom fann maður að þetta yrði auðveldara.“

Hann viðurkennir að hann hafi verið hræddur við þennan leik. „Þetta hefur verið þannig hjá okkur í sumar að við höfum spilað vel gegn sterku liðunum en lent í vandræðum með liðin úr neðri hluta deildarinnar.“

„En það var ekkert út á leikinn okkar að setja í kvöld. Ég veit ekki hvað við sköpuðum okkur mörg færi í leiknum í kvöld.“