Bjarni: Það blómstruðu allir

Bjarni Jóhannsson þjálfari Stjörnunnar var hinn kátasti eftir að hafa stýrt liði sínu til stór sigurs á heimavelli gegn FH, 4-0.

„Frábær innkoma í þennan leik sem skóp það að við náðum forystunni. Síðan eftir korter í fyrri hálfleik fannst mér við í tómu basli út hálfleikinn. Vorum langt frá mönnunum og óskynsamir. Við fórum of framarlega gegn þeim í stöðunni 1-0. Það var frábær markvarsla Ingvars sem hélt okkur inni í leiknum í fyrri hálfleik og upphafi seinni hálfleiks. Svo þegar við skoruðum annað markið þá blómstruðu allir,“ sagði Bjarni en Stjarnan var líklegri til að skora fimmta markið en FH að minnka muninn.

„FH þurfti að koma framar á völlinn og við með þessa fljótu menn þarna frammi sem ógna stanslaust inn fyrir línuna. Það er ekkert grína að eiga við þessa menn. Ég vildi ekki vera bakvörður á móti þeim, enda var ég aldrei fljótur,“ sagði léttur Bjarni.

FH þurfti að skipta um markvörð snemma í seinni hálfleik vegna meiðsla Gunnleifs og skömmu seinna opnuðustu flóðgáttir og Stjarnan skoraði þrjú mörk á átta mínútum.

 

„Gunnar Sigurðsson er frábær markmaður en hefur ekki spilað mikið í sumar. Við áttum stórhættuleg færi fyrri utan þessi mörk sem við gerðum.  Það er frábært að vinna þennan leik og frábært að fá ekki á sig mark, við fögnum því hér í Garðabæ.“

„Það sem einkennir okkur í seinni hálfleik er að við klárum leikina á algjörum krafti. Erum í fínum gír,“ sagði Bjarni sem vildi ekki meina að lið hans væri komið á fullt í baráttuna um Evrópusætið með þessum eina sigri.

„Ég veit það nú ekki, við þurfum fyrst að ná þessu liði sem er fyrir ofan okkur og svo skulum við sjá hvað kemur upp úr kössunum í lok í september,“ sagði Bjarni.