Greining Arion banka spáir óbreyttum stýrivöxtum

Greining Arion banka spáir óbreyttum stýrivöxtum á næsta vaxtákvörðunarfundi þann 17. ágúst n.k.  Greining telur að við núverandi aðstæður í hagkerfinu myndi vaxtahækkun aðeins gera illt verra.

Þetta kemur fram í Markaðspunktum greiningarinnar. Þar segir að í ljósi þeirrar stöðu sem hagkerfið er í um þessar mundir er það mat greiningarinnar að vaxtahækkun sé  ekki til þess fallin að slá á auknar verðbólguvæntingar, ef eitthvað er gætu verðbólguhorfur versnað,  þar sem fjármagnskostnaður hins opinbera og fyrirtækja hækkar.

„Slík hækkun myndi hafa neikvæð áhrif á efnahagsuppbyggingu í landinu og þann brothætta bata sem framundan er. Þá yrði vaxtahækkun algjörlega á skjön við það sem er að gerast úti í heimi en biðstaða virðist vera á frekari vaxtahækkunum í Evrópu eftir hrun fjármálamarkaða síðustu daga,“ segir í Markaðspunktunum.

„Þrátt fyrir að áhrif hrunsins sé ekki farið að gæta hér heima þá er óvissan enn mikil og telur greiningin að Seðlabanki Íslands muni fylgja öðrum seðlabönkum úti í heimi og kjósi þannig að rugga ekki bátnum á meðan óvissa ríkir á alþjóðamörkuðum.“

Þá kemur fram að verðbólgan sem gengur nú yfir er í afar litlum mæli drifin áfram af aukinni eftirspurn í hagkerfinu. Þær verðhækkanir sem eiga sér nú stað má að miklu leyti rekja til hækkunar á framboðshliðinni þar sem kostnaðarliðir eins og hækkandi hrávöruverði úti í heimi, veiking krónunnar, opinberar hækkanir og samningsbundnar launahækkanir er ýtt út í verðlagið.

„Það er alveg ljóst að Seðlabankinn er að kljást við erfitt vandamál, vandamál sem stýrivextir hafa engin áhrif á...skýra liðir eins og eldsneyti, matvörur, rafmagn og hiti ríflega helming verðbólgunnar sem gengið hefur yfir á síðustu tólf mánuðum,“ segir í Markaðspunktunum.

„Að mati greiningar er útlit fyrir að ársverðbólgan muni hækka á komandi mánuðum þar sem áhrifa vegna kjarasamninga sem og annarra kostnaðarhækkana eiga enn eftir að koma fram, en ef engir nýir kostnaðarliðir koma til þá er útlit fyrir að á endanum gangi verðbólgan niður og að efnahagsslakinn virki þá sem skyldi,  þ.e. slakinn dregur úr frekari verðhækkunum í hagkerfinu.“