Heimir Hallgrímson fær UEFA Pro þjálfaragráðu

Heimir Hallgrímsson, þjálfari ÍBV í Pepsi-deild karla, hefur útskrifast með UEFA Pro þjálfaragráðu. Heimir, sem starfar dagsdaglega sem tannlæknir, er áttundi Íslendingurinn til þess að útskrifast með gráðuna. Þetta kemur fram á heimasíðu KSÍ.

Heimir lauk námi sínu hjá enska knattspyrnusambandinu og er sá fimmti til að gera það. Guðjón Þórðarson, Sigurður Ragnar Eyjólfsson, Willum Þór Þórsson og Þorvaldur Örlygsson fengu réttindi sín einnig í Englandi.

Atli Eðvaldsson, Teitur Þórðarson og Zeljko Óskar Stankovic eru einnig með réttindi en sóttu þau til annarra landa.

Ólafur Helgi Kristjánsson, þjálfari Íslandsmeistara Breiðabliks, líkur sinni gráðu í desember en hann er um þessar mundir á námskeiði hjá knattspyrnusambandi Danmerkur. Þá er Dragan Kristinn Stojanovic nýbyrjaður á UEFA Pro námskeiði í Makedóníu.