Þórður: Ekki okkar dagur

Þórður Þórðarson, þjálfari ÍA, segir að sínir leikmenn hafi verið taugaóstyrkir þegar þeir töpuðu fyrir BÍ/Bolungarvík, 2-1, í 1. deildinni í kvöld.

Skagamönnum dugði jafntefli til að tryggja sér sæti í Pepsi-deildinni fyrir næstu leiktíð en máttu sætta sig við tap gegn Guðjóni Þórðarsyni og lærisveinum hans að vestan.

„Þetta er auðvitað svekkjandi. Hér var allt til alls - 1500 áhorfendur, logn og frábær völlur. En þetta var ekki okkar dagur,“ sagði Þórður.

„Það er erfitt að segja hvað fór úrskeðis. Við unnum lítið af seinni boltum og þeir dældu mikið af háum boltum fram sem við áttum erfitt með. Við áttum líka erfitt með Ameobi í loftinu.“

Skagamenn fengu þó tækifæri til að jafna metin úr vítaspyrnu í blálok leiksins en Þórður Ingason varði þá frá Mark Doninger.

„Mér fannst Þórður verja það mjög vel. Þetta var góð spyrna en samt er það nú þannig að öll víti sem ekki er skorað úr eru léleg víti.“

„En nú þýðir ekkert annað en að setja hausinn upp. Það er ekki eins og að heimurinn hafi verið að hrynja - þetta var okkar fyrsti tapleikur í deild í rúmt ár. Við höldum bara áfram.“