Bjarnólfur ráðinn þjálfari Víkings

Knattspyrnudeild Víkings réð í dag Bjarnólf Lárusson sem þjálfara liðsins. Hann tekur við starfinu af Andra Marteinssyni sem hætti í gær. Tómas Ingi Tómasson, sem var rekinn frá HK á dögunum, verður aðstoðarmaður Bjarnólfs.

Hér að neðan má lesa yfirlýsingu knattspyrnudeildar Víkings:

Bjarnólfur Lárusson var í dag ráðinn þjálfari meistaraflokks karla hjá Víkingi út yfirstandandi tímabil. Bjarnólfur sem er uppalinn Vestmannaeyingur lék upp alla yngri flokka með ÍBV. Hann spilaði 130 mfl. leiki með ÍBV og varð tvisvar sinnum Íslandsmeistari og einu sinni bikarmeistari með þeim. Síðar spilaði hann með meistaraflokki KR í þrjú ár. Bjarnólfur á að baki fjölda leikja með yngri landsliðum Íslands og þá spilaði hann í 4 ár í Bretlandi með Hibernian, Walsall og Scunthorpe.

Bjarnólfur hefur náð frábærum árangri með 2. flokk félagsins sem er sem stendur í efsta sæti A riðils Íslandsmótsins. Sá árangur Bjarnólfs er hvatinn að því að stjórn knattspyrnudeildar hefur nú fengið hann til þess að taka við meistaraflokki félagsins.

Aðstoðarmaður Bjarnólfs verður Tómas Ingi Tómasson sem var mikill markaskorari á árum áður með ÍBV, KR, Þrótti og Grindavík hér á landi auk þess sem hann spilaði með FC Berlin, Raufoss og AGF sem atvinnumaður. Tómas Ingi er aðstoðarmaður Eyjólfs Sverrissonar hjá U21 árs landsliðs Íslands.

Stjórn knattspyrnudeildar býður Bjarnólf og Tómas Inga velkomna til starfa og væntir mikils af þeim í því verkefni sem er framundan.