Umfjöllun: Keflavíkursigur á teppinu

Keflavík vann góðan sigur á Stjörnumönnum 3-2 í kvöld á teppinu í Garðabæ. Með sigrinum fór liðið upp í 17 stig og er í sjötta sæti Pepsi deildarinnar. Stjörnumenn eru í fjórða sæti eftir gott gengi að undanförnu.

Leikurinn fór vel af stað fyrir heimamenn og voru þeir töluvert betri í fyrri hálfleik. Ellert Hreinsson, Hörður Árnason og Nicolaj Pedersen fengu allir góð færi fyrstu 20 mínúturnar. Það kom því lítið á óvart þegar þeir náðu forustunni með marki Baldvins Sturlusonar. En Adam var ekkert sérstaklega lengi í paradís. Stjörnumenn fögnuðu aðeins of lengi, hausinn hélt ekki og Keflvíkingar voru rúmlega 60 sekúndur að jafna. Guðmundur Steinarsson tók þá aukaspyrnu frá vinstri og Einar Orri skallaði í netið.

Síðari hálfleikur byrjaði fjörlega. Stjörnumenn gerðu tilkall til vítaspyrnu þegar boltinn fór í hendina á Haraldi fyrirliða – hann nánast greip hann, en Þóroddur Hjaltalín dæmdi brot á Garðar Jóhannsson sem var í baráttunni við Harald. Þóróddur stóð vaktina með prýði í kvöld en þarna urðu honum á mistök. Stjörnumenn voru ósáttir og ræddi Garðar lengi við Þórodd um atvikið.

Fótboltinn er grimmur og Keflvíkingar geystust fram og skoraði Magnús Þorsteinsson og kom Keflvíkingum yfir. En þessi blessaði Adam, hann greinilega kann ekki að vera í paradís, því Stjarnan jafnaði og aftur var Þóroddur í aðalhlutverki.

Eftir basl í teignum braut Ómar í marki Keflvíkinga á Ellert Hreinssyni, boltinn barst á Garðar Jóhannsson sem skoraði í autt markið. En Þóroddur var of fljótur á flautuna og dæmdi víti en lyfti engu spjaldi. Við það voru Stjörnumenn ekki sáttir en líklega var þetta réttur dómur hjá Þóroddi.

Eftir jöfnunarmarkið kvöddu leikmenn skemmtilegan fótbolta og næstu 20 mínútur voru ótrúlega leiðinlegar. En allt í einu birtist Guðmundur Steinarsson. Átti alveg snilldarsendingu fyrir markið þar sem Hilmar Geir Eiðsson var einn og óvaldaður inni í teignum og skallaði í netið. Varnarmenn Stjörnunnar voru hvergi nærri. 3-2 urðu lokatölur, sanngjarnt eða ekki. Það spyr enginn að því.