Umfjöllun: Fylkismenn frábærir í seinni hálfleik

Fylkir lagði Grindavík 4-1 á útivelli í kvöld og lyfti sér þar með upp í fimmta sæti með átján stig en Grindavík er nú eina liðið sem Fram og Víkingur horfa til í veikri von sinni um að halda sæti sínu í deildinni.

Veðrið í Grindavík var ekki tilvalið til fótboltaiðkunar, hávaðarok og blautt. Það kom nokkuð niður á gæðum leiksins. Þrátt fyrir það fengu heimamenn óskabyrjun þegar Robert Winters skoraði eftir laglega sendingu Matthíasar Arnar inn fyrir flata vörn Fylkis en markið má að nokkru skrifa á tvo miðjumenn Fylkis sem tækluðu hvorn annan og töpuðu boltanum sem hrökk til Matthíasar.

Fylkir var meira með boltann í fyrri hálfleik en það var Grindavík sem skapaði sér hættulegustu færin og voru mun nær því að skora.

Allt annað var að sjá til Fylkis eftir leikhléð og voru þeir komnir yfir eftir aðeins tíu mínútna leik. Fylkir pressaði mikið strax í byrjun og héldu því áfram eftir þessa óskabyrjun á seinni hálfleik því aðeins eitt lið virtist vera á vellinum í seinni hálfleik.

Grindavík fór varla yfir miðju og brotnaði liðið ótrúlega auðveldlega við smá mótlæti og virðist sem leikmenn liðsins treysti á slakt gengi Fram og Víkings í botn baráttunni því liðið nær ekki í  mörg stig til viðbótar í sumar með þessari spilamennsku.

Fylkir bætti við tveimur mörkum áður en yfir lauk en þau hefðu getað verið enn fleiri þar sem yfirburðirnir voru  miklir. Eftir fjóra leiki án sigurs er Fylkir farið að sýna sama baráttu andann og snarpa sóknarleik og skilaði liðinu í topp baráttuna framan af sumri.



Grindavík-Fylkir 1-4

1-0 Robert Winters ´6

1-1 Ingimundur Níels Óskarsson ´51 víti

1-2 Andrés Már Jóhannesson ´55

1-3 Andri Þór Jónsson ´75

1-4 Tómas Þorsteinsson ´85

Grindavíkurvöllur. Áhorfendur: 561

Dómari:  Vilhjálmur Alvar Þórarinsson 7

Skot (á mark): 3-11 (1-7)

Varið: Óskar 3 – Fjalar 0

Hornspyrnur: 2-8

Aukaspyrnur fengnar: 8-9

Rangstöður: 1-1