Kunna að vera fleiri sprengjur á svæðinu

Ögmundur Jónasson, innanríkisráðherra, lét þau orð falla í viðtali við Vísi að fleiri sprengjur kynnu að vera í Osló, á svæðinu þar sem miklar sprengingar urðu á öðrum tímanum í dag.

„Það er ljóst að þarna voru sprengingar og það kunna að vera jafnvel fleiri ósprungnar sprengjur á svæðinu.“ sagði Ögmundur og ítrekaði mikilvægi þess að taka fregnum um atvikið af yfirvegun og rósemi. „Það er náttúrulega eina leiðin að bregðast við á þessu stigi, á meðan verið er að upplýsa um hvað þarna raunverulega gerðist.“

Ögmundur segir íslensk lögregluyfirvöld fylgjast mjög vel með því sem er að gerast á svæðinu, en hann segist ekki sjá fram á að gripið verði til sérstakra aðgerða á Íslandi í tengslum við sprengingarnar. "Við munum bara einfaldlega fylgjast með framvindu mála."