Ólafur Örn: Verður ströggl fram á haust

Ólafur Örn Bjarnason þjálfari Grindavíkur og annar miðvörður liðsins var myrkur í máli eftir að Fylkir tók heimamenn í kennslustund í seinni hálfleik.

„Við vorum duglegir, stóðum í tæklingunum, fengum færi og hefðum getað skorað meira í fyrri hálfleik, flottir í hálfleik og það á ekki að vera vandamál á móti smá vindi ef menn eru duglegir. Þetta var flottur leikur til að koma okkur í flotta stöðu, ná Fylki og jafnvel Keflavík og komast frá botninum en þá er eins og menn séu ekki stærri en þetta. Það er eins og menn sætti sig við að vera í ströggli allt sumarið,“ sagði Ólafur Örn.

„Ég er vonsvikinn því það er eins og það vanti vilja og dugnað í seinni hálfleik til að gera eitthvað. Menn voru á hælunum og leyfðu Fylki að spila eins og þeir vildu, með þessu áframhaldi verður þetta ströggl fram á haust.“

„Hvað vilja menn? Eru menn sáttir þar sem þeir eru eða vilja menn fara hærra. Það er eitthvað sem menn þurfa að átta sig á og menn þurfa að hafa fyrir því, þú færð ekkert upp í hendurnar. Við áttum fínan leik síðast og það er ekki í fyrsta skipti sem það gerist að vera lélegir eftir góðan leik en það er eins og menn séu ánægðir með þessa litlu sigra og skilja ekki hvað þarf til að ná lengra,“ sagði þjálfarinn sem var augljóslega reiður yfir spilamennsku síns liðs.