Valur getur endurheimt efsta sætið

Valsmenn geta endurheimt toppsætið í Pepsi-deild karla í knattspyrnu takist liðinu að leggja Stjörnumenn að velli á Hlíðarenda í kvöld. KR-ingar skutust upp fyrir Valsmenn með 3-0 sigri á Fylki í gærkvöld.

KR-ingar hafa tveggja stiga forskot á erkifjendur sína þegar bæði lið hafa leikið níu leiki. Bæði lið hafa unnið sjö leiki í sumar. KR-ingar hafa aftur á móti gert tvö jafntefli meðan Valsmenn hafa tapað tveimur leikjum.

Valur og Stjarnan unnu þriggja marka sigra í síðustu umferð. Valsmenn unnu Þór 3-0 fyrir norðan en Stjörnumenn sýndu mikinn karakter og unnu Fylki 4-1.

Valsmenn tóku Stjörnuna í kennslustund á Vodafone-vellinum síðasta sumar og unnu 5-1 sigur.

Valur á 100 ára afmæli á árinu og margan Valsmanninn dreymir um Íslandsmeistaratitilinn í afmælisgjöf. Liðið varð síðast Íslandsmeistari árið 2007 undir stjórn Willums Þórs Þórssonar. Aðeins tveir leikmenn úr því liði spila enn með Hlíðarendapiltum. Atli Sveinn Þórarinsson og Sigurbjörn Hreiðarsson.

Leikur liðanna hefst klukkan 20 og verður lýst á Boltavaktinni. Þá er leikurinn einnig í beinni útsendingu á Stöð 2 Sport.