FH-liðið orðið of gamalt?

Hörður Magnússon velti því upp í Pepsi-mörkunum á Stöð 2 í gærkvöld hvort FH-liðið væri orðið of gamalt. FH-ingar töpuðu 3-1 gegn ÍBV í Eyjum og þótti frammistaða þeirra ekki góð. Magnús Gylfason og Reynir Leósson, sérfræðingar þáttarins, höfðu sína skoðun á vandamálum FH-liðsins.

„Þetta voru gríðarlega vonbrigði fyrir FH að tapa þessum leik. FH-ingar litu á þennan leik sem úrslitaleik til að bjarga sumrinu hjá sér. Þeir eru dottnir út úr bikarnum og hefðu getað kastað sér í efri hlutann og hangið í efstu liðunum. En eins og þeir sögðu sjálfir í viðtölum þá geta þeir kvatt toppbaráttuna í bili," sagði Magnús.

Hörður velti því upp hvort FH-liðið væri orðið of gamalt.

„Ef þú talar um lykilmenn. Bjarki, Tommy, Ásgeir, Freyr, Atli Viðar þá eru allt strákar sem eru komnir á efri árin," sagði Magnús.

Þá ræddu þeir um leikmannakaup FH-inga síðastliðin ár.

„Það hefur verið mikið talað um leikmenn á borð við Herra Fjölni og nokkra útlendinga sem áttu að fylla í skörð. Nú síðast úr Keflavík og Hólmar Örn. Útlendingarnir síðust ár og jafnvel Íslendingarnir, þetta hefur alls ekki gengið upp," sagði Magnús.

Reynir Leósson hafði sína skoðun á vandamálum Hafnfirðinga.

„Við höfum ekki séð FH-inga ná að setja upp þetta háa tempó í þessum lykilleikjum. Á móti ÍBV ná þeir ekki að setja upp þessa pressu sem þeir hafa verið þekktir fyrir undanfarin ár. Þessir strákar hljóta að vera í góðu formi en hausinn er ekki í lagi og þá verða lappirnar þungar," sagði Reynir

„Þegar þeir hafa mætt liðum sem hafa pressað þá, eins og gegn ÍBV og KR, þá lenda þeir í vandræðum. Þegar þeir fá að spila snin bolta, líkt og gegn Grindavík, þá fá þeir að spila sinn bolta. Þeir setja pressu hátt á vellinum og þá blómstra þeir. Þeir virðast hins vegar ekki ná að mæta bestu liðunum á þann hátt. Þeir hafa einfaldlega ekki kraftinn í það," bætti Reynir við.