Rándýr gæsla á Skaganum

Sjálfboðaliðar leika lykilhlutverk hjá íslenskum knattspyrnufélögum og öðrum íþróttafélögum. Skagamenn buðu upp á einn velþekktan í gæslunni í leik liðsins gegn Leikni í gærkvöldi. Ólafur Þór Hauksson, sérstakur saksóknari, sá til þess að allt færi eðlilega fram.

Ekki er vitað til þess að Ólafur Þór hafi þurft að taka á honum stóra sínum á Akranesvelli í gær. Það þykir undirrituðum ólíklegt enda stærri laxar þurft að standa fyrir máli sínu gagnvart Ólafi undanfarin ár en knattspyrnubullur.

Skagamenn unnu 2-0 sigur á Leikni í 1. deild karla í knattspyrnu í gær með tveimur mörkum Englendingsins Mark Doniger. Mörkin komu sitt hvorum megin við leikhléið. Skagamenn sitja á toppi deildarinnar og enn ósigraðir. Fátt virðist geta komið í veg fyrir að félagið endurheimti sæti sitt í efstu deild karla.