Þjálfari Rosenborgar segir liðið ekki vanmeta Breiðablik

Noregsmeistarar Rosenborgar taka á móti Breiðablik á Lerkendahl-vellinum í Þrándheimi í forkeppni Meistaradeildar Evrópu í knattspyrnu í kvöld. Jan Jönsson, þjálfari liðsins, segir að norska liðið muni ekki vanmeta íslenska liðið.

Rosenborg varð Noregsmeistari á síðustu leiktíð og tapaði ekki leik í deildinni. Liðið hefur þó átt erfitt uppdráttar á yfirstandandi leiktíð og situr í 6. sæti eftir fjórtán leiki.Rosenborg hefur hins vegar mikla reynslu úr Evrópukeppnum og hefur komist í riðlakeppni Meistaradeildar Evrópu ellefu sinnum.

„Við munum ekki vanmeta þá. Meistaradeildin gefur krydd í keppnistímabilið hjá okkur og var mikil hvatning fyrir strákana þegar við áttum erfitt uppdráttar í upphafi deildarkeppninnar,“ sagði Jönsson þjálfari Rosenborgar í viðtali á heimasíðu evrópska knattspyrnusambandsins.

Rosenborg var um tíma í næsta neðsta sæti deildarinnar en liðið tapaði fjórum af fyrstu sjö leikjum sínum. Liðið hefur þó rétt úr kútnum að undanförnu og er á uppleið.

„Við höfum náð góðum úrslitum undanfarnar vikur sem hafa hjálpað okkur að byggja upp sjálfstraust,“ sagði Jönsson.

Leikur Rosenborgar og Breiðabliks fer fram á Lerkendahl-vellinum í Þrándheimi í kvöld og hefst klukkan 18:45. Síðari leikur liðanna fer fram á Kópavogsvelli að viku liðinni.