Guðjón: Svekkjandi en enginn heimsendir

Guðjón Baldvinsson, sóknarmaður KR, segir að það hafi verið svekkjandi að fá á sig jöfnunarmark gegn Val á síðustu mínútum leik liðanna í kvöld.

„Þetta er mjög svekkjandi niðurstaða, sérstaklega að fá á sig jöfnunarmark eftir fast leikatriði á síðustu mínútu,“ sagði Guðjón við Vísi eftir leikinn.

„Það var enginn glæsibragur á okkar leik í kvöld. Valsliðið spilar aftarlega á vellinum og beitir skyndisóknum. Þeir eru duglegir að loka svæðum og gerðu sitt vel í kvöld. En það er líka alveg ljóst að við áttum ekki okkar besta dag í kvöld.“

„Við höfum eytt mikilli orku í síðustu leiki og það hefur sitt að segja. En við töpuðum þó ekki og erum enn á toppnum. Þetta er svekkjandi en enginn heimsendir.“

„ÍBV tapaði í dag og þau úrslit eru þægileg fyrir okkur. En ég er samt svekktur enda eigum við ekki að missa þetta niður á síðustu mínútunum.“