Atli Viðar: Vonandi er krísan að baki

Atli Viðar Björnsson skoraði þrennu í 7-2 sigri FH-inga gegn Grindavík í kvöld. Hann var skiljanlega ánægður með leik sinna manna.

„Þetta var einhvern veginn þannig dagur að það gekk allt upp hjá okkur. Við vorum agressívir og flottir. Fengum fullt af færum og fullt af mörkum," sagði Atli Viðar.

Erfitt var fyrir viðstadda að átta sig á því hvort FH-ingar væru allt í einu komnir aftur á beinu brautina eða hvort Grindvíkingar hafi hreinlega gefið þeim sigurinn.

„FH-liðið er auðvitað stútfullt af góðum fótboltamönnum og þegar við hittum á svona leik þá erum við góðir. En ég get ekki ímyndað mér að Grindvíkingar séu ánægðir með sinn leik í dag. Þeir hljóta að geta gert betur," sagði markahrókurinn.

FH-liðið minnti á meistaralið síðasta áratugar og allt annað að sjá til liðsins í kvöld en fyrr í sumar.

„Ég er sammála því. Þetta var allt annða. Við erum að fá fullt af færum. Miklu fleiri en þessi sjö sem við gerum. Vonandi er þessi lægð eða krísa sem við vorum í að baki," sagði Atli Viðar.