Bjarni: Spiluðum frábærlega

Bjarni Jóhannsson þjálfari Stjörnunnar hitti svo sannarlega naglan á höfuðið þegar hann skipti varnarmanninum Tryggva Sveini Bjarnasyni inná í framlínuna þegar tæpur hálftími var eftir af leiknum gegn Fylki í kvöld. Tryggvi skoraði eftir mínútu og það lagði grunninn að 4-1 sigrinum.

„Tryggvi kom rosalega sprækur inn og það sem réði þessari ákvörðun minni var sú að ég var mjög ánægður með spilamennskuna úti á velli og vildi lítið hrófla við því og þar sem við erum ekki með neinn haug af framherjum var næsta skref að setja Ellert fram en mér fannst hann svo ógnandi á kantinum að ég ákvað að setja Tryggva inn á. Svona getur gerst og Tryggvi átti frábæra innkomu,“ sagði Bjarni.

„Við spiluðum þennan leik frábærlega frá upphafi til enda og eigum tvö fín færi áður en þeir skora. Þá sváfum við á verðinum. Fylkir eru frægir fyrir að sækja hratt og vera ákveðnir fram á við. Þeir sækja á fljótum strákum og flinkum en við afgreiddum þetta í seinni hálfleik.“

„Það var ótrúlegur dampur á liðinu í 90 mínútur. Við vorum ferskir og fljótir og eins og ég hef sagt í sumar þá er hver leikur alltaf skref fram á við. Við erum alltaf að spila betur og betur. Það er flott að fara í 14 stig,“ sagði Bjarni að lokum.