Ólafur: Barnaskapur að spila svona varnarleik

Ólafur Kristjánsson þjálfari Blika var sæmilega sáttur með leik sinna manna í samtali við blaðamann. Hann hafði hann áhyggjur af slælegum varnartilburðum sinna manna en er þó ekki farinn að örvænta þótt stigataflan sýni ekki eins mörg stig og margir Blikar höfðu vonast eftir.

„Ég er sáttur að ná þó í stigið og snúa leiknum við eftir að hafa verið lengi undir. en ég er jafn óánægður með að missa þægilegt forskot niður svona snögglega í fyrri hálfleik. Þannig að það má segja að þetta sé súrsætt. Við byrjuðum miklu betur í leiknum en eins og oft áður í sumar náðum við ekki að búa til almennilegt forskot og hleyptum Víkingunum inn í leikinn.  

Við sýndum því miður slælegan varnaleik í fyrri hálfleik og það er einfaldlega barnaskapur að spila svona varnaleik eins og við gerðum í mörkum Víkinga. Menn eru að renna til á vellinum og gefum þeim alltof auðveld færi.

Varnaleikurinn okkar í sumar hefur ekki verið eins þéttur og í fyrra og kannski er ástæðan sú að liðin bakka meira niður gegn okkur og þá þurfum við að fara hærra á völlinn. Þar af leiðandi opnum vði okkur meira. Við höfum verið að vinna í varnaleiknum en höfum því miður ekki náð að stoppa almennlega í götin. Varnaleikur er meira en fjórir öftustu og það er allt liðið sem þarf að huga að því að verjast betur," sagði Ólafur.

Aðspurður um hvort hann gæti tekið einhverja jákvæða punkta úr leiknum hafði Ólafur þetta að segja

„Dylan skoraði og það er örugglega kærkomið fyrir hann. Mér fannst margir vera að spila ágætlega og við sýndum oft góða sóknartilburði en það telur ekkert þegar þú nærð ekki að breyta sóknunum í mörk.“

6 sæti eftir 9 leiki er ekki óskastaða  fyrir Ólaf og og lærisveina hans en er hann byrjaður að örvænta?

"Við erum með 5 stigum færra en á sama tíma og í fyrra. Við erum ekki farnir að örvænta. Mótið klárast í október og þá skulum við telja stigin."