Ármann Pétur: Þeir kláruðu færin sín

Ármann Pétur Ævarsson leikmaður Þórs sagði Blikana hafa nýtt færin sín í 4-1 sigri Kópavogsliðsins. Þar hefði skilið á milli.

„Þeir gerðu það sem gera þarf. Kláruðu færin. Við vorum að vissu leyti heppnir að fara inn í hálfleikinn 2-1. Þægileg staða sem við ætluðum að notfæra okkur. Við eigum fullt af færum en svo snýst þetta við. Þeir skora 3-1 og þetta orðið erfitt. Svo sækjum við aftur en fáum á okkur fjórða markið. Þá var þetta orðið erfitt," sagði Ármann Pétur.

Þórsarar áttu fjölmörg færi í seinni hálfleiknum til þess að jafna metin áður en Blikar skoruðu mörkin tvö.

„Það var aðallega ég sem var ísskaldur. Því miður gekk það ekki upp hjá mér í dag. Ég átti fimm eða sex skot sem eiga að fara inn hjá mér. En það gekk ekki í dag," sagði Ármann Pétur.

Ármann Pétur hefur trú á því að Þór geti haldið sér í deildinni.

„Við gefum ekkert eftir hvort sem við töpum eða vinnum. Hver leikur er þrjú stig. Ég get ekki gefið þér neitt annað en svona dipló svör," sagði Ármann.

Þórsarar voru á leiðinni í flug norður á Akureyri en þeir hafa farið landleiðina nokkrum sinnum.

„Það er fínt að fá flug heim. Þreyttir fætur eftir leikinn. Hann tók á. Það er fínt að fljúga í staðinn fyrir að keyra," sagði Ármann að lokum.