Ólafur: Svæfðum okkur sjálfir

Ólafur Örn Bjarnason þjálfari Grindavíkur sagði ekkert annað skipta máli en að Grindavík væri komið áfram í bikarnum þó hann hafi óneitanlega vonast eftir auðveldari leik í ljósi þess að Grindavík komst snemma í 2-0 þegar Grindavík marði botnlið fyrstu deildar 2-1 á heimavelli í gær manni færri allan seinni hálfleikinn.

„Við vissum að þeir voru að skipta um þjálfara og maður veit ekki alveg hvað það hefur að segja. Yfirleitt byrja menn vinna í að vera öryggir varnarlega eftir þjálfara skipti og ég bjóst við að þeir myndu bakka á okkur og við fengjum tíma með boltann,“ sagði Ólafur eftir leikinn en þrátt fyrir mörkin tvö var ekki leiftrandi sóknarbolti á boðstólnum hjá Grindavík í leiknum.

„Þetta var of mikill göngubolti í byrjun en svo fáum við tvö fín mörk og þá dettum við aftur niður í göngubolta og svæfum okkur sjálfa og missum einbeitingu. Við hleypum þeim inn í leikinn með aula marki og svo með því að láta reka okkur útaf. Þá vitum við að seinni hálfleikurinn verður strembinn.“

„Þetta opnaðist í lokin þar sem bæði lið fá færi en ég er vanur að lesa ekki of mikið í þessa bikarleiki. Þeir snúast bara um eitt og það er að komast áfram og við komumst áfram.“

Grindavík freistaði þess að sækja hratt í seinni hálfleik þegar færi gáfust enda erfitt að halda boltanum lengi einum færri. „Við sátum í raun og veru ekki aftur. Þeir fá ekki færi fyrr en í lokin. Við spiluðum þetta ágætlega og vorum ógnandi þegar tækifærin gáfust en við eyddum meiri púðri í leikinn en ég vonaði þegar við komumst í 2-0 en svona er þetta þegar menn halda ekki einbeitingu og það hefur áhrif á allt liðið og liðinu var refsað grimmilega fyrri að sleppa inn marki og einn leikmaður fyrir að láta reka sig útaf.“

Í uppbótartíma hefði Grindavík átt að skora þrjú mörk því þrisvar komust framherjar liðsins einir gegn markverði en Ögmundur Ólafsson varði reyndar vel í tvígang á 96. mínútu. „Ég vil ekki kenna þreytu um að menn nýti ekki færin. Þegar menn eru komnir einir í gegn þá á það að enda í netinu og þegar menn eru komnir tveir gegn markverði þá á það að enda í markinu, mér er sama þó menn séu á hnjánum eða ekki,“ sagði Ólafur sem sér enga ástæðu til að láta menn æfa þessi færi á næstu æfingum.

„Ég held það sé óþarfi að æfa þetta, þeir munu aldrei fá svona færi aftur, á ævinni.“