Ragnar: Getum spilað fótbolta

Ragnar Gíslason nýr þjálfari botnliðs HK í 1. deildinni í fótbolta var að mörgu leyti sáttur við leik sinna manna sem tapaði 2-1 fyrir Grindavík í 16 liða úrslitum Valitor bikarsins í kvöld.

„Ég held að við höfum sýnt að við getum alveg spila fótbolta. Við fengum færi til að jafna þennan leik þó undir lokin að þeir fái tvö þrjú dauðafæri þá er það út af því að við erum allir komnir í sóknina,“ sagði Ragnar en HK var refsað fyrir að fá á sig tvö mörk á fimm mínútna kafla áður en 20 mínútur voru liðnar af leiknum.

„Það eru ákveðin atriði sem við þurfum að vinna í, þetta er bara minn fyrsti leikur með liðið, en það eru ákveðin atriði sem flokkast undir einbeitingarleysi sem valda því að við fáum þessi tvö mörk á okkur. Heilt yfir er ég nokkuð sáttur.“

„Við áttum allan séns á að jafna leikinn en það vantaði smá meiri greddu inni í teig. Ég veit ekki hvort menn séu of óvanir því að vera í þessum færum en við höfðum allan séns á að jafna þennan leik, ef ekki meira,“ sagði Ragnar.

„Það er hundfúlt að tapa en heilt yfir spiluðum við fínan fótbolta, eftir þessar fyrstu 20 mínútur.“