Ólafur Örn: Verðum að vera á tánum

Ólafur Örn Bjarnason var að vonum svekktur með tap sinna manna gegn toppliði KR. Grindvíkingar héldu vel í við þá svarthvítu í fyrri hálfleik en sprungu á limminu í þeim síðari.

„Þetta var svo sem allt í lagi hjá okkur í fyrri hálfleik. Gegn liði eins og KR þá er mikilvægt að byrja á því að skora. Við nýttum okkur ekki neitt af því sem við fengum í fyrri hálfleik og það voru ákveðin tækifæri fyrstu 45 mínútur leiksin,“ sagði Ólafur Örn.

„KR-ingar eru erfiðir við að eiga þegar þeir ná forystu og í seinni hálfleik var þetta strembið. Við vorum samt sem áður sjálfum okkur verstir í þessum mörkum. Við vorum að missa boltann klaufalega á hættulegum stöðum og sterkt lið eins og KR nýtir sér svona mistök.“

„Við töluðum um það fyrir leikinn að það þyrfti að vera á tánum allan leikinn gegn KR því annars refsa þeir okkur og það var það sem þeir gerðu.“