Áttuðu sig fyrst á grafalvarlegri stöðu Orkuveitunnar í lok janúar

Það var ekki fyrr en 28. janúar sem stjórnendum Orkuveitunnar í Reykjavík varð ljóst að staða Orkuveitunnar væri grafalvarleg, og að fyrirtækið væri tæknilega gjaldþrota.

Þetta kom fram í viðtali við Bjarna Bjarnason, forstjóra Orkuveitunnar í Kastljósi í kvöld.

Það var síðasta haust sem Orkuveitan sagði upp 65 starfsmönnum auk þess sem gjaldskrár voru hækkaðar með það að markmiði að gera fyrirtækið lánshæft á erlendum lánamörkuðum. Kjartan Magnússon, borgarfulltrúi Sjálfstæðisflokksins, og stjórnarmaður Orkuveitunnar, mótmælti reyndar uppsögnunum og lagði þá til að starfshlutföll starfsmanna yrðu minnkuð.

Bjarni sagði í Kastljósi að stuttu síðar hefði farið fram ítarlega greining á starfsemi Orkuveitunnar og skýrslu skilað þann 28. janúar síðastliðinn.

Niðurstaðan virðist hafa verið sláandi; þar kom í ljós að Orkuveitan gæti meðal annars ekki borgað starfsfólki sínu laun næsta sumar kæmi ekki til björgunar líkt og borgarráð Reykjavíkur samþykkti í dag.

Ráðið samþykkti 12 milljarða króna lán eigenda Orkuveitunnar til fyrirtækisins. Og Orkuveitan kynnti á blaðamannafundi róttækar niðurskurðaraðgerðir sem miða að því að rétta reksturinn við.

Fjárfestingum verður frestað og eiga að sparast með því 16 milljarðar króna. Rekstrarkostnaður verður lækkaður um 5 milljarða. Tíu milljarðar eiga að koma inn með sölu eigna, átta milljarðar með öðrum sparnaði og svo 12 milljarða lán frá eigendum Orkuveitunnar.

Þá verður einnig sett á laggirnar nokkurskonar rannsóknarnefnd sem skal skoða það hvernig Orkuveitan komst í þessa þröngu stöðu sem kostar borgarbúa milljarða.

Sjálfur vildi Bjarni ekki tjá sig um fortíðina í viðtali við Kastljós.

„Verkefnið mitt er ærið, en ég er hvorki sagnfræðingur né dómari," sagði Bjarni þegar sjónvarpsmaðurinn Helgi Seljan gekk á hann í viðtalinu um skoðanir hans á fortíð fyrirtækisins.

Spurður út í ummæli borgarstjórans um viðkvæma stöðu Orkuveitunnar sagðist Bjarni standa í þeirri trú að þau hefðu engin áhrif haft erlenda banka sem vilja ekki lána Orkuveitunni fé.

Þá sagði Bjarni að það væri vissulega áhyggjuefni að eignir Orkuveitunnar færu á brunaútsölu í ljósi stöðunnar, en til stendur að selja eignir fyrir um tíu milljarða. Meðal þeirra eigna er gagnaveitan.

Stjórn Orkuveitunnar hefur hinsvegar ekki tekið ákvörðun um að setja gagnaveituna í söluferli, en Kjartan, borgarfulltrúi Sjálfstæðisflokksins, lagði fram tillögu á síðasta stjórnarfundi Orkuveitunnar, um að skoðað yrði möguleikana á að selja veituna, sem er enn skilgreind sem hluti af kjarnastarfsemi Orkuveitu Reykjavíkur.