Einar Árni: Töpuðum á varnarleiknum

Einar Árni Jóhannsson, þjálfari Njarðvíkur, var ekki sáttur við varnarleik síns liðs í kvöld. Njarðvíkingar töpuðu með tólf stiga mun fyrir KR í fyrsta leik liðanna í átta liða úrslitum Íslandsmótsins í körfubolta.

"Við vorum mjög slakir varnarlega í seinni hálfleik og það var bara leikurinn. Þeir skoruðu einhver 60 stig í seinni hálfleik og þá er mjög erfitt að vinna."

"Þetta var barningur milli tveggja góðra liða. Það er svekkjandi að við duttum svona mikið niður því varnarleikurinn var ekki slæmur í fyrri hálfleiknum. Það er ýmislegt sem við þurfum að fara yfir fyrir næsta leik," sagði Einar.

Njarðvíkingar eiga heimaleik á sunnudag og verða að vinna hann því annars eru þeir farnir í sumarfrí.