Grunnskólanemum fækkar

Nemendur í grunnskólum á Íslandi voru 42.539 haustið 2010, auk þess sem 91 barn stundaði nám í 5 ára bekk í 4 skólum.

Grunnskólanemendum hefur fækkað um 390 frá síðastliðnu skólaári eða um 0,9%. Grunnskólanemendur á Íslandi voru flestir haustið 2003, 44.809. Frá þeim tíma hefur grunnskólanemendum fækkað um 2.270 nemendur. Gera má ráð fyrir að nemendum fækki áfram á næstu tveimur árum en þá verði botni í fjölda nemenda náð. Eftir það eru væntanlegir fjölmennari árgangar í grunnskólann en þeir árgangar sem ljúka munu námi.

Þessar tölur koma úr gagnasafni Hagstofu Íslands, sem hefur safnað upplýsingum um nemendur í grunnskólum á Íslandi í október ár hvert síðan haustið 1997.

Nemendum á hvert stöðugildi kennara fjölgar

Undanfarin ár hefur fjöldi nemenda á hvern kennara farið stöðugt lækkandi frá því að vera 11,4 nemendur á hvern kennara árið 1998 í það að vera 9,1 nemandi á hvern kennara haustið 2008. Frá þeim tíma hefur þetta hlutfall farið hækkandi og eru 9,3 nemendur á hvern kennara haustið 2010.

Sé þetta hlutfall skoðað út frá stöðugildum kennara, voru 13,3 nemendur að baki hverju stöðugildi kennara árið 1998. Með árunum hefur þetta hlutfall farið lækkandi allt til haustsins 2008 er 9,3 nemendur voru skráðir á hvert stöðugildi kennara. Haustið 2009 hækkaði þetta hlutfall í fyrsta skipti í mælingum Hagstofunnar og haustið 2010 eru 9,8 nemendur á hvert stöðugildi kennara.

Fjöldi grunnskólanemenda með erlent móðurmál stendur í stað

Grunnskólanemendum sem hafa erlent tungumál að móðurmáli hefur fjölgað ár frá ári frá því að Hagstofan hóf að safna inn gögnum haustið 1997. Árið 1997 voru 377 nemendur skráðir með erlent tungumál að móðurmáli. Haustið 2010 höfðu 2.318 nemendur erlent móðurmál eða 5,4% nemenda, og hafði fjölgað um 4 nemendur frá árinu á undan. Fjölgun milli áranna 2008 og 2009 var 245 nemendur. Eins og undanfarin ár eru flestir pólskumælandi, 768 talsins, og hefur fjölgað um 8 milli ára. Þá fjölgar nemendum sem hafa filippseysk mál að móðurmáli um 20, lettneskumælandi um 11 og litháskumælandi nemendum fjölgar um 9. Nemendum sem hafa ensku að móðurmáli fækkaði um 17 og þeim sem hafa rússnesku að móðurmáli fækkaði um 13 frá fyrra ári.

Nemendum í einkareknum grunnskólum fjölgar

Alls starfa 172 grunnskólar á landinu, sem er fækkun um þrjá skóla frá fyrra ári. Grunnskólum fer fækkandi vegna sameiningar og hefur fækkað um 24 skóla frá árinu 1998. Fjölmennasti grunnskóli landsins er Álfhólsskóli (732 nemendur) í Kópavogi sem varð til með sameiningu Digranesskóla og Hjallaskóla. Aðrir fjölmennir skólar eru Lágafellsskóli (697), Árbæjarskóli (664), Rimaskóli (663) og Varmárskóli (661). Fámennasti grunnskólinn er Finnbogastaðaskóli á Ströndum þar sem 4 nemendur stunda nám og er það eini grunnskólinn með færri en 10 nemendur. Í sérskólum, sem eru 4 talsins, stunda 136 nemendur nám. Einkaskólarnir eru 10 talsins með 759 nemendur. Ekki hafa áður verið fleiri nemendur í einkareknum grunnskólum á Íslandi frá upphafi gagnasöfnunar Hagstofu Íslands haustið 1997.

Sjá vef Hagstofunnar