Umfjöllun: Markalaust og leiðinlegt

Þór og Grindavík gerðu markalaust jafntefli og bragðdaufum og tíðindalitlum leik fyrir norðan. Hvorugt liðið virtist þora að sækja til sigurs.

Hér fyrir neðan birtust sjálfkrafa allar helstu upplýsingar um framvindu leiksins, leikmannahópa liðanna auk textalýsingar frá blaðamanni Vísis á vellinum.

Fyrri hálfleikur var rólegur lengst af. Þórsarar náðu ögn meiri tökum á leiknum en gestirnir, en þó var leikurinn í ágætu jafnvægi. Hann var hægur og lítt spennandi.

Þórsarar fengu nokkur hálffæri, ekkert sem truflaði Óskar í markinu alvarlega. Sveinn Elías Jónsson var í banni og David Dizstl á bekknum en Jóhann Helgi Hannesson olli nokkrum usla í fremstu víglínu.

Grindvíkingar voru lengi í gang en tóku við sér undir lok hálfleiksins þegar þeir fengu tvö góð færi. Fyrst Orri Freyr, sem var tosaður niður en stóð upp og náði boltanum, skot hans fór framhjá. Hann heimtaði víti en fékk ekki.

Óli Baldur fékk svo frábæra sendingu í gegnum vörnina, lék á Þorstein Ingason fyrirliða en skot hans einn gegn Rajkovic var langt framhjá. Glórulaust skot en hann ætlaði að setja boltann utanfótar í samskeytin fjær. Hefði verið nær að setja hann einfalt og innanfótar framhjá Rajkovic.

Staðan í hálfleik markalaus.

Bæði lið fengu hálffæri, Alexander átti góðan sprett og skot beint á Rajkovic og Gunnar Már skallaði yfir.

Leikurinn var mjög hægur og liðin voru afar spör á sóknarþunga. Alltof spör. Hvorugt lið virtist þora að taka áhættu, enda mikið í húfi.

Niðurstaðan var drepleiðinlegur leikur þar sem afskaplega lítið markvert gerðist. Bæði lið geta gert betur, sérstaklega hvað skot varðar en öll skot leiksins fóru beint á markmennina, ef þau hittu markið á annað borð.

Þórsarar fengu sitt fyrsta stig eftir þrjú töp í röð en liðin hafa nú 18 stig, Fram er með ellefu stig í fallsætinu og á leik til góða.

Undir lokin áttu bæði Derek Young og Scott Ramsay að fá rauð spjöld, Young fyrir að sparka í Vrenko sem sat á vellinum og Ramsay fyrir tveggja fóta tæklingu.

Þór 0-0 Grindavík

Þórsvöllur. Áhorfendur: Um 700.

Dómari: Kristinn Jakobsson 4

Tölfræðin

Skot (á mark): 9-12 (3-6)

Varin skot: Srjdan 6 - Óskar 3

Horn: 3-2

Aukaspyrnur fengnar: 10-12

Rangstöður: 1-1