Ramsay: Biðst afsökunar á tæklingunni

Scott Ramsay sá ástæðu til að biðjast afsökunar á slæmri tæklingu sinni undir lokin á markalausa jafnteflinu við Þór í dag.

Ramsay fór í tveggja fóta tæklingu án þess að koma við Þórsarann, en hitti sem betur fer ekki. Hann fékk þó aðeins gult spjald fyrir vikið.

"Ég verð að biðjast afsökunar, þetta er ástæðan fyrir því að ég tækla ekki, ég kann það ekkert," sagði Ramsay sem ítrekaði afsökunarbeiðni sína tvisvar.

"Annars er lítið að segja um leikinn. Þetta var leiðinlegur leikur og steindautt jafntefli. Við fengum eitt stig, ekkert annað er hægt að taka héðan."

"Við verðum bara að nýta færin okkar. Þetta snýst um það. Við fengum færin til að skora og vinna en við klúðruðum þeim illa. Ef maður nýtir ekki þessi færi vinnur maður ekki leiki."

"Þetta er það sama og í mörgum síðustu leikjum, við þurfum bara að nýta þessi færi og þá erum við í fínum málum," sagði Ramsay með sínum einstaka skoska hreim.