Aðeins þrír voru með í síðasta sigurleik í undankeppni HM eða EM

Það eru liðnir 1056 dagar síðan íslenska landsliðið vann síðast leik í undankeppni en sá sigur kom á móti Makedóníu á Laugardalsvellinum 15. október 2008. Ísland og Kýpur mætast á Laugardalsvellinum í kvöld en í hálfgerðum úrslitaleik um næstsíðasta sætið í riðlinum.

Það eru aðeins þrír leikmenn í leikmannahópnum í kvöld sem tóku þátt í þessum umrædda sigurleik fyrir tveimur árum, tíu mánuðum og tuttugu og tveimur dögum. Kristján Örn Sigurðsson, Eiður Smári Guðjohnsen og Birkir Már Sævarsson voru allir í byrjunarliðinu í þessum leik.

Veigar Páll Gunnarsson var einnig í byrjunarliðinu og skoraði sigurmarkið á 16. mínútu en hann var settur út úr hópnum fyrir þennan leik. Byrjunarliðsmennirnir Gunnleifur Gunnleifsson og Hermann Hreiðarsson voru einnig valdir í hópinn en forfölluðust vegna meiðsla.

Indriði Sigurðsson var líka í byrjunarliðinu fyrir þremur árum og spilaði síðasta leik við Norðmenn á föstudaginn en Indriði getur ekki leikið í kvöld vegna veikinda.

Aðrir byrjunarliðsmenn í þessum sigurleik á Makedónum voru þeir Grétar Rafn Steinsson, Stefán Gíslason og Brynjar Björn Gunnarsson en þeir Theódór Elmar Bjarnason, Aron Einar Gunnarsson og Pálmi Rafn Pálmason komu síðan allir inn á sem varamenn í leiknum.