Í gærkvöldi hélt klúbbur matreiðslumeistara á Íslandi stórglæsilegan hátíðarkvöldverð í Veisluturninum.

Forseti Íslands, Ólafur Ragnar Grímsson, og Dorrit Moussaieff voru á meðal heiðursgesta hátíðarinnar eins og undanfarin ár.

Fjölmiðlar fá ekki aðgang að sjálfum veisluhöldunum en Vísir fékk leyfi til að mynda á meðan undirbúningurinn stóð sem hæst í eldhúsi Veisluturnsins aðeins klukkustund áður en hátíðin var sett.

„Það eru seldir um það bil 210 miðar á hverju ári og 90% prósent af þeim sem mæta eru sömu aðilarnir ár eftir ár," útskýrir Óskar Finnsson veitingamaður.

„Fyrir ári síðan var sérstök hátíðarnefnd skipuð og hún sá um að deila út verkefnum fyrir þetta umrædda kvöld. Steinn Óskar Sigurðsson er formaður undirbúningsnefndar í ár."

„Kokkarnir hafa þróað réttina á veitingastöðunum þeirra alveg frá því um miðjan október í fyrra.

„Þá komu þeir saman, diskúteruðu og bjuggu til endanlegan matseðil."

„Bæði í gærkvöldi og snemma í morgun hafa matreiðslumeistararnir verið hér í Turninum til að gera allt klárt," segir Óskar.

„Vox fékk til dæmis villigæsina, Dill matreiðir bleikjuna, Texture í London sér um grænmetið, Bocuse d´Or Akademían eldar hreindýrið, Hótel Holt sér um smálúðuna."

„Fiskmarkaðurinn sér um humarinn, Veisluturninn eldar nautalundin, Grillið sér um ostana, Mosfellsbakarí bakar desertinn og landskokkarnir sjá um konfektið," útlistar Óskar að lokum spurður út í matseðil kvöldsins.

Á meðfylgjandi myndum má sjá að andrúmsloftið var frábært í eldhúsi Veisluturnsins þrátt fyrir að veisla ársins væri um það bil að hefjast.