Lýður yfirheyrður

Yfirheyrslur á vegum embættis sérstaks saksóknara vegna rannsóknar á málefnum Exista standa nú yfir. Lýður Guðmundsson, annar Bakkavarabræðranna, mætti til yfirheyrslu klukkan ellefu í morgun. Þá kom fram í hádegisfréttum RÚV að bróðir hans Ágúst hefði einnig verið yfirheyrður í morgun.

Húsleitir fóru fram á tólf stöðum í gær í Reykjavík og London í tengslum við rannsóknina.

Embætti sérstaks saksóknara rannsakar fimm atriði, sem öll varða ákvarðanir sem teknar voru af hálfu forsvarsmanna Exista skömmu fyrir og eftir bankahrun 2008.

Meðal þess sem er til rannsóknar er niðurfelling persónulegra ábyrgða á lánum sem veitt voru við kaup starfsmanna Exista á hlutabréfum í félaginu. Forstjórar Existu tóku ákvörðun um niðurfellinguna skömmu eftir bankahrun, en þeir voru sjálfir með slík lán.

DV segir frá því í dag að heildarupphæð lánanna sé 1,2 milljarður. Auk þess er til rannsóknar yfirfærsla hlutabréfa Sigurðar Valtýssonar, annars forstjórans, í félag á Tortóla skömmu fyrir hrun og tilkynning um hlutafjáraukningu í félaginu Exista um 50 milljarða.

Þá er sala Existu á Bakkavör til bræðranna Ágústs og Lýðs Guðmundssona til skoðunar. Til rannsóknar eru ætluð brot gegn almennum hegningarlögum og hlutafélagalögum.

Lýður og bróðir hans Ágúst munu hafa verið staddir í Bretlandi þegar aðgerðirnar hófust í gær, en eru nú komnir til landsins. Samkvæmt heimildum er Lýður í yfirheyrslu þessa stundina.