Varúlfar alltaf jafn vinsælir

Varúlfar eru þjóðsagnaverur sem hafa löngum verið vinsælt umfjöllunarefni í Hollywood. The Wolfman með Benicio Del Toro í aðalhlutverki er nýjasta dæmið um það.

Leikstjóri The Wolfman er Joe Johnston sem hefur áður sent frá sér myndir á borð við Honey I Shrunk The Kids, October Sky og Hidalgo. Auk Benicio Del Toro fara með helstu hlutverk þau Emily Blunt, Anthony Hopkins og Hugo Weavin.

The Wolfman er endurgerð samnefndrar myndar frá árinu 1941 og fjallar um Lawrence Talbot (Benicio Del Toro) sem snýr aftur til heimabæjar síns eftir að bróðir hans týnist. Fljótlega kemst hann að því að einhver ógurleg skepna er byrjuð að stráfella bæjarbúa.

Varúlfur er heiti á manni sem getur brugðið sér í úlfslíki eða haft hamskipti án þess að vilja það endilega sjálfur og þá oftast vegna einhvers konar álaga. Hamskiptin eiga sér yfirleitt stað á fullu tungli og í flestum varúlfamyndum er sýnt hvernig þau eiga sér stað. Fjallað hefur verið um varúlfa nánast frá upphafi kvikmyndasögunnar, fyrst í myndinni Werewolf of London sem kom út árið 1935 á vegum Universal. Sex árum síðar framleiddi fyrirtækið sína aðra varúlfamynd, The Wolfman, sem hefur nú verið endurgerð. Hún fékk mun betri viðtökur og hefur haft mikil áhrif á þær varúlfamyndir sem hafa fylgt í kjölfarið.

Árið 1981 komu út tvær varúlfamyndir sem slógu í gegn. Annars vegar The Howling, sem gat af sér hvorki meira né minna en sex framhaldsmyndir, og hins vegar American Werewolf in London sem fjallaði um tvo bandaríska ferðamenn sem verða fyrir árás varúlfs. Framhald hennar kom svo út sextán árum síðar við heldur dræmari undirtektir.

Jack Nicholson var skemmtilegur varúlfur í hinni gamansömu spennumynd Wolf. Þar lék hann bókaútgefanda sem er bitinn af varúlfi með áhugaverðum afleiðingum. Annar sniðugur varúlfur var Michael J. Fox í Teen Wolf sem var sýnd við miklar vinsældir um miðjan níunda áratuginn.

En aftur að hinni endurgerðu The Wolfman, því íslenski förðunarmeistarinn Stefán Jörgen starfaði við myndina eftir að Rick Baker, sexfaldur Óskarsverðlaunahafi í förðun, óskaði eftir kröftum hans. Eins og kom fram í Fréttablaðinu í ágúst síðastliðnum hafði Stefán mjög gaman af verkefninu en hitti þó enga af stjörnunum sem leika í myndinni. Annars má geta þess að það tók rúmar þrjár klukkustundir að farða Del Toro fyrir hlutverkið og eina í viðbót til að taka farðann af. Hárbeittar gervitennur og úfnar, svartar hárkollur komu einnig við sögu til að útkoman yrði nú sem allra eðlilegust.