Alfreð í miklum vandræðum

Það eru erfiðir tímar hjá Alfreð Gíslasyni, þjálfara Kiel. Liðið er aðeins í þriðja sæti þýsku úrvalsdeildarinnar og meiðslalistinn virðist lengjast með hverri viku og hafa menn þar á bæ miklar áhyggjur af stöðu mála.

"Meistaratitillinn er fjarlægur draumur í dag," sagði tékkneska stórskyttan Filip Jicha en Kiel er fimm stigum á eftir toppliði Hamburg.

Kiel tókst að tjasla örvhentu skyttunni Christian Zeitz saman um daginn en það entist ekki lengi því hann meiddist aftur og spilar ekki meira á þessu ári.

Fyrir vantar menn eins og Daniel Narcisse, Marcus Ahlm og Kim Andersson er að skríða á lappir.

Alfreð Gíslason er mikill baráttumaður og hann hefur ekki lagt niður vopnin þrátt fyrir erfiða stöðu.

"Við erum Kiel og við munum berjast allt til enda," sagði Alfreð.