Guðmundur í stærsta starfi handboltaheimsins

Skartgripamógúllinn Jesper Nielsen er eigandi danska ofurliðsins AG København og aðaleigandi þýska stórliðsins Rhein-Neckar Löwen. Guðmundur Guðmundsson landsliðsþjálfari er yfirmaður íþróttamála hjá báðum félögunum en fyrr á þessu ári var hann ráðinn til AG til að byrja með. Starfssvið hans hefur nú verið stækkað.

Íþróttastjórastarfið hjá AG var einstakt í handboltanum og að vera með sama titil hjá einu allra besta liði Þýskalands gerir það enn stærra. Störfin gerast vart stærri í handboltaheiminum en annar Íslendingur, Alfreð Gíslason, stýrir Kiel sem er líklega stærsta þjálfarastarf handboltaheimsins.

„Ég er að vinna með Jesper fyrir bæði félögin en það er mikið samstarf á milli þeirra. Ég sinni ýmsum verkefnum hjá Rhein-Neckar Löwen sem snúa að íþróttalegu hliðinni hjá félaginu. Þar á meðal eru leikmannamál og ég vinn að því að finna leikmenn fyrir félögin," segir Guðmundur.

Hann segir að þrátt fyrir að hann sé að vinna fyrir tvö félög séu engir hagsmunaárekstrar í starfinu. „Þetta fer mjög vel saman. Þetta skarast ekkert og það er ekkert erfitt að velja hvaða leikmenn fara hvert ef ég finn einhvern," segir Guðmundur og bætir við að hugsanlega sé hægt að flytja leikmenn á milli félaganna.

„Það er möguleiki á því ef þörf er á en það yrði sameiginleg ákvörðun á milli okkar og þjálfaranna, auk þess sem það þyrfti að gera í félagaskiptaglugganum og eftir öllum reglum."

Sem dæmi um samstarfið á milli félaganna eru þau nú bæði með liðin á Spáni í sameiginlegum æfingabúðum. Liðin spila æfingaleik í dag og hafa ráðið Claes Hellgren sem markmannsþjálfara fyrir bæði félögin.

Guðmundur verður áfram búsettur í Kaupmannahöfn en hann kemur til með að ferðast mikið til Þýskalands. Um einn og hálfur tími í flugi er til Heidelberg þar sem hans önnur bækistöð verður.

Guðmundur er einnig ánægður með hversu vel starfið fellur að hinu starfi hans, sem landsliðsþjálfari Íslands. „Þar sem ég vinn mikið í Danmörku og Þýskalandi fæ ég tækifæri til að sjá mikið af leikjum hjá Íslendingunum.

Starf mitt felst að hluta til í því að horfa á leiki og greina þá. Auk þess eru auðvitað íslenskir landsliðsmenn hjá báðum félögum," segir Guðmundur sem nýtur svo liðsinnis Óskars Bjarna Óskarssonar með leikmenn heima á Íslandi.

Ólafur Stefánsson, Guðjón Valur Sigurðsson og Róbert Gunnarsson eru á mála hjá Rhein-Neckar Löwen og Arnór Atlason og Snorri Steinn Guðjónsson hjá AG. Sá síðastnefndi kom einmitt til liðsins frá Löwen.

Guðmundur hefur þegar fengið Ólaf Guðmundsson til AG frá FH þar sem hann verður í láni á næsta tímabili. Guðmundur útilokar ekki að fleiri íslenskir leikmenn komi til félaganna.

Guðmundur fær fullan stuðning til að halda áfram með íslenska landsliðið. „Þetta starf gerir það að verkum að ég kem enn ferskari inn í störf fyrir landsliðið. Ef ég væri aðalþjálfari hjá stóru félagsliði samhliða landsliðsþjálfarastarfinu væri ég kannski þreyttari. Það verður ekki uppi á teningnum og þetta verður engin kvöð. Ég get fengið mína útrás fyrir þjálfun með landsliðinu sem ég bíð spenntur eftir að gera."