Ólafur tekur þátt í sterku móti

Kylfingurinn Ólafur Björn Loftsson fær tækifæri til þess að feta í fótspor Tiger Woods er hann tekur þátt í USC Collegiate Invitational-mótinu sem fram fer í Los Angeles. Frá þessu er greint á kylfingur.is í dag.

Ólafur leikur með Charlotte-háskólanum en þetta mót er mjög sterkt þar sem flest af bestu háskólaliðunum taka þátt. Charlotte er í 49. sæti á styrkleikalista Golfweek og Ólafur í 242. sæti á einstaklingslistanum.

Tiger Woods vann þetta mót með Stanford háskólanum árið 1996 en á meðal annarra þekktra kylfinga sem hafa sigrað þetta mót eru Corey Pavin, Paul Casey og Anthony Kim.