Tilkynningum vegna heimilisofbeldis fjölgaði

Tilkynningum til barnaverndarnefnda fjölgaði um 3% á fyrstu mánuðum ársins samanborið við fyrstu þrjá mánuðina í fyrra, samkvæmt tölum frá Barnaverndastofu. Nokkur munur er á þessum tölum eftir landsvæðum en tilkynningum fækkaði lítillega á höfuðborgarsvæðinu en fjölgaði utan höfuðborgarsvæðisins um 10%.

Hlutfall tilkynninga þar sem um heimilisofbeldi var að ræða hækkaði úr 3,7% tilkynninga fyrstu þrjá mánuðina í fyrra í 5,8% fyrstu þrjá mánuði þessa árs. Flestar tilkynningar voru hins vegar vegna áhættuhegðunar barna. Þær voru 44,7% tilkynninga fyrstu þrjá mánuði ársins en voru 49,2% tilkynninga fyrstu þrjá mánuðina í fyrra. Barnaverndanefndum bárust tilkynningar vegna 1.993 barna á fyrstu þremur mánuðunum í ár en vegna 2.011 barna á sama í fyrra.

Það er Barnaverndastofa sem tekur tölurnar saman en þess má geta að í dag eru fimmtán ár síðan að stofnunin tók til starfa og hefur Bragi Guðbrandsson verið forstjóri hennar frá upphafi.