Grátlega léleg stemning hjá FCK

Magnus Andersson, þjálfari handboltaliðs FCK, var hneykslaður yfir því hversu fáir áhorfendur mættu til þess að styðja liðið gegn Kiel í Meistaradeildinni í gær.

Aðeins 1.750 manns mættu á leikinn og margir þeirra voru stuðningsmenn Kiel enda fékk þýska liðið mun meiri hvatningu úr stúkunni en heimamenn.

„Þetta var pínlegt. Sorglegt að sjá ekki fleiri á vellinum þar sem við vorum að spila á móti einu besta liði heims," sagði Andersson svekktur.

„Það var eins og Þjóðverjarnir væru á heimavelli. Það er mjög pirrandi að fá ekki stuðning þegar við þurfum virkilega á honum að halda."

Það var ekki nema um 20 manna hópur sem virkilega studdi danska liðið í leiknum. Aðrir fylgdust með og gæddu sér líklegast á rækjusamlokum.

Það er ljóst að Jesper Nielsen, eigandi hins nýja liðs AGK, mun þurfa að huga að markaðsmálunum fyrir næsta vetur.

Hann ætlar sér að fá 4.000-5.000 manns á leiki nýja liðsins næsta vetur en handboltaáhuginn í Kaupmannahöfn hefur ekki verið mikill og áhorfendur latir að mæta á leiki hjá FCK sem er þó eitt besta lið Danmerkur.