„Ég hef aldrei séð barnið mitt svona hræðilega þjáð“

„Hún er enn meðvitundarlaus, í einhvers konar dái," segir Ragna Erlendsdóttir, móðir Ellu Dísar sem liggur alvarlega veik á Barnaspítala Hringsins. Ella Dís fékk magapest fyrir um tveimur vikum og hefur hún ekki náð að jafna sig. Ástæða veikindanna er þó enn ókunn. „Læknarnir komust að því að hún var hættulega lág í sódíum og vilja meina að hún sé jafnvel með heilabjúg, þess vegna sé hún svona meðvitundarlaus og sé ekki með okkur," segir Ragna í samtali við Vísi.

Ella Dís er tæplega fimm ára gömul en þegar hún var á öðru aldursári fór að bera á lömun í höndum sem ágerðist hratt og eftir mikla þrautargöngu hjá læknum komust þeir að þeirri niðurstöðu að hún væri með sjálfsofnæmi.

Þrátt fyrir að Ella Dís hafi glímt við erfið veikindi síðustu ár virðist staðan nú vera enn alvarlegri en áður. „Ég hef aldrei séð barnið mitt svona hræðilega þjáð," segir Ragna.

Vökvasöfnun í heila

Hún segist hafa óskað eftir því að læknarnir taki mynd af heila til að hægt sé að sjá hvort um heilaskaða er að ræða, en að sögn Rögnu telja læknar að vökvasöfnun og þrýstingur í heila sé ástæða þess að dóttir hennar er ekki með meðvitund.

Ragna var stödd á Barnaspítalanum þegar blaðamaður náði tali af henni en Ragna er stöðugt við hlið dóttur sinnar. Faðir Ellu Dísar kom með flugi frá Englandi eftir að veikindin nú ágerðust og fá foreldrarnir stuðning frá ættingjum og vinum.

Kyssti hana og knúsaði

„Þetta er svo óraunverulegt. Ég bara bíð eftir að hún vakni. Ég lagði mig hér áðan og þegar ég vaknaði kyssti ég hana og knúsaði en hún opnaði bara augun og lokaði þeim strax aftur. Hún vaknaði ekki. Ég er mjög áhyggjufull," segir Ragna.

Gríðarleg verkjaköst

Ómögulegt er að segja hvernig líðan Ellu Dísar verður þegar líður á daginn þar sem breytingar hafa orðið ört á líðan hennar síðustu sólarhringa. „Líklega hefur hún smátt og smátt verið að verða meira veikburða eftir magapest og niðurgang. Síðan gerðist það bara allt í einu að hún varð svona lasin. Laugardagurinn var algjör martröð og hún var með gríðarleg verkjaköst. Hún var orðin svo dofin og kveinkaði sér ekki einu sinni þegar læknarnir stungu hana," segir Ragna.

Hrædd móðir

Það hefur tekið mjög á hana að horfa á litlu dóttur sína fara frá því að vera sárþjáð og yfir í að vera án meðvitundar. „Ég er búin að vera mjög sorgmædd og leið og hrædd. Það hefur hrætt mig að sjá hana í þessu ástandi. Ég hef aldrei séð hana svona. Það er eitthvað algjörlega nýtt við þetta," segir Ragna. Ella Dís hefur einu sinni komist nálægt því að vera jafn þungt haldin og nú. Það var árið 2008 þegar hún hafði farið í þrjár misheppnaðar aðgerðir og lá á gjörgæslu.

„Ég vona að hún berjist gegn þessu. Hún var orðin svo heilbrigð og lífsglöð. Hún er brött. Ég veit að hún gerir sitt besta," segir Ragna.

Bænirnar hjálpa

Hún segist þakklát fyrir allan þann stuðning sem dóttir hennar fær. „Það hefur hjálpað okkur mikið. Ég vona bara að fólk biðji fyrir henni. Það skiptir okkur svo miklu máli hvað við höfum fengið mikla ást og mikinn kærleik, kveðjur á Facebook og í sms. Þessi stuðningur skiptir okkur öllu. Ég er algjörlega vanmáttug," segir hún.

Bloggsíða móður Ellu Dísar

Facebook-síða Ellu Dísar