GOG missir sterka leikmenn

Danska handknattleiksliðið hefur misst nokkra sterka leikmenn úr sínum röðum vegna fjárhagsvandræða félagsins.

Extra Bladet greinir frá því í morgun að þeir Peter Svensson og Fredrik Petersen séu báðir á leið frá félaginu.

Það var svo staðfest síðdegis að Svensson hafi samið við Bjerringbro-Silkeborg til loka tímabilsins 2012. Þá er talið að Svíinn Petersen, sem var markahæsti leikmaður deildarinnar á síðasta tímabili, sé á leið til Valladolid á Spáni.

Þá er einnig fullyrt að Grænlendingurinn Minik Dahl Höegh sé á leið til Fredericia.

Guðmundur Guðmundsson er þjálfari GOG og Ásgeir Örn Hallgrímsson leikur með liðinu. Óvíst er með framtíð þeirra hjá félaginu en Guðmundur sagði í samtali við Vísi að hann vissi lítið meira en það sem hefði komið fram í fjölmiðlum.

„Annars vil ég lítið segja um þetta. Eins og er ætla ég að einbeita mér að landsliðinu og annað verður bara að fá að hafa sinn gang.“