Íslendingar komu að gerð norsku skýrslunnar

Skýrsla fyrirtækisins LYNX Advokatfirma um starfsemi Landsbankans er mikill áfellisdómur yfir stjórnendum Landsbankans og endurskoðendum hans, PricewaterhouseCoopers. Fram kemur í skýrslunni að Íslendingar hafi komið að gerð hennar, en hún var unnin fyrir embætti sérstaks saksóknara.

Skýrsluhöfundar höfðu aðgang að öllum skjölum hjá Fjármálaeftirlitinu og þeim gögnum sem embætti sérstaks saksóknara hafði aðgang að hjá skilanefnd Landsbankans. Þá kemur fram að Norðmennirnir hjá LYNX hafi notið aðstoðar frá Ernst & Young á Íslandi og eru þau Hrólfur Þór Valdimarsson og Sigrún Pétursdóttir nefnd sérstaklega í því samhengi. Þau hafi fengið það hlutverk að yfirfara og veita aðstoð sem snertu skjöl á íslensku frá endurskoðendum.

Skýrsluhöfundar segja að helstu takmarkanir á störfum þeirra við gerð skýrslunnar hafi falist í skorti á beinum aðgangi að bankanum sjálfum, þ.e skilanefnd og slitastjórn. Þá hafi þeir heldur ekki haft stöðu til að taka skýrslur af fyrrverandi starfsmönnum bankans og fyrrverandi endurskoðendum. Skýrsluhöfundar telja að þess vegna sé nauðsynlegt fyrir embætti sérstaks saksóknara að fara sérstaklega yfir öll gögn Landsbankans til að sannreyna ályktanir og niðurstöður þeirra.