Schumacher enn öflugur ökumaður

Ross Brawn, yfirmaður Brawn liðsins segir að Michael Schumacher sé enn jafn einbeittur og hann var með Ferrari.

"Schumacher var orðinn þreyttur á Formúlu 1 og hætti þess vegna, en hann er endurnærður. Hann er mjög ástríðufullur og hefur unnið af kappi að því að bæta bílinn ásamt Nico Rosberg. Schumacher er á svipuðu róli og hann var og það er jafnfræði með ökumönnunum tveimur", sagði Brawn.

"Ég er viss um að Schumacher á eftir að finna sekúndubrot hér og þar, hann er enn að venjast aðstæðum. Hann er að komast í rétta gírinn. Ég hef engar áhyggjur af Schumacher, en við verðum að bæta bílinn", sagði Brawn.