Raunsætt að fækka stofnunum ríkisins um 30-40%

Jóhanna Sigurðardóttir forsætisráðherra vill fækka ráðuneytum úr tólf í níu á þessu ári og telur raunsætt að fækka megi ríkisstofnunum um 30-40 prósent á næstu tveimur til þremur árum.

Þetta kom fram í ræðu hennar á flokksstjórnarfundi Samfylkingarinnar á laugardag. Jóhanna talaði þar fyrir því að félagsmála- og heilbrigðisráðuneyti verði sameinuð í nýtt velferðarráðuneyti, landbúnaðar, sjávarútvegs- og iðnaðarráðuneyti verði sameinuð í atvinnuvegaráðuneyti, en samgöngu- og dómsmálaráðuneyti verði lögð saman í innanríkisráðuneyti. Slík sameining opni á nýja nálgun í stjórnsýslu með sameiningu stofnana. „Sé horft til þess að ríkisstofnanir eru í dag um tvö hundruð talsins og margar þeirra sinna svipuðum verkefnum er ljóst að ná má fram verulegri langtímahagræðingu í rekstri með því að sameina stofnanir og endurskoða verkaskiptingu á milli þeirra. Ég tel að það sé raunsætt markmið að fækka ríkisstofnunum um 30-40 prósent á næstu 2-3 árum," sagði Jóhanna. „Hér yrði um að ræða umfangsmestu breytingar og uppstokkun sem átt hefur sér stað í ríkisrekstri á Íslandi."

- pg